كلمة مولانا الإمام الشيخ محمد رضي الله عنه اليوم 6/6/2015
في الحقيقية ..
انا في موضوعين هسة ذكروهم هنا كنت بس داير اعلق عليهم إنه - الموضوع الأول اللي هو الموضوع بتاع أوراد الطلبة اللي ذكروه هسة ده-
الموضوع بتاع أوراد الطلبة ده زي الما الجميع هنا عارفين انو نحن مطالبين كمسلمين بطلب العلم زي ما قالو من المهد إلى اللحد يعني فمعناه لو نحن اخدنا الطالب بمعنى أنه طالب العلم معناه نحن كلنا طلبة، عشان الموضوع ده ما يتفهم بصورة تانية، فإذا كان نحن كلنا بقينا طلبة من باب انه الناس ممكن تقرأ أوراد الطلبة فمعناه الموضوع ده الناس ما ممكن تكون محتهدة في اورادا، الزول البقولو دائما البيركن، بيركن للأسباب البتخليهو انو ما ممكن يتقدم لقدام أو ما ينجح بيلقاه، والزول الهمتو عالية اللي هو بيجد في عزائم الأمور. حصلت إحصائية قبل كده في كوريا الجنوبية بيقولو إنه الطلاب الدايرين يخشو الجامعة اي طالب ينوم اكتر من أربعة ساعات البي أربعة ساعات ده قالو بلقى مقعد في الجامعة الخمسة ساعات الموضوع بقى فيفتي فيفتي إحتمال يخش وإحتمال ما يخش، البنوم اكتر من ستة ساعات في اليوم ده ما عنده طريقة بتاعة جامعة. فاوراد الطلبة الناس ما تاخدا إلا -
حتى الواحد لو عنده امتحانات لو قسم وقتو صاح ممكن يكون بواصل في أوراده ودي هي بالعكس كمان انحنا عندنا بزيدو ليهو أوراده سواء كان صلاة إبن بشيش أو غيرا في سبيل انها تساعده في الامتحانات، فقضية أنه الناس تركن لاوراد الطلبة دي ما صحيحة. مرة في واحد من الإجتماعات كان اتكلمت مع واحدة من السيدات بتقول أنه مولانا بيقول انه السيدات ما يقرو الحزب السيفي طبعا كل المرشدين أو الناس القبل كده ارشدو سيدات بيعرفو انه السيدة بتاخد الحزب السيفي بعد ما تستقيم في كل الاوراد بعد داك بباركو ليها في الاوراد بيزيدو ليها في الأوراد، لكن إذا كانت الأساسيات ما عملتا الحزب السيفي بالنسبة ليها ما مطلوب،
فيعني العزائم - عزائم الأمور- هي البتخلي الواحد يمشي لقدام أو أنه الواحد يقدر يتقدم أو أنه الواحد يستثمر لوقته وكده. بعدين الحتة بتاعة التواصل والترابط بين الإخوان يعني أنه افتكر انه في حاجات الواحد بينه وبين نفسو بيعرف انها ما بتشبهو وما بتشبه الطريقة وما بتشبه أهلا( أهلها) الواحد لو بقي ما فيهو خير لرقبتو ما بكون عنده خير لأسرته ما بكون عنده خير للأمة يعني ما بقدر يتقدم لقدام، فأنا افتكر انه الناس يعني تمشي في اتجاه العلم والعمل الناس لو ما مشت كده ما - ببقى الكلام ده كلام ساي، زي ما قلنا هسة نحن هنا كتير من المواضيع الناس بتفتحا وتتكلم فيها لكن الواحد كان يتمنى انه الموضوع ده كل الناس تعملو منهج، يعني حتى من الشباب أو من الناس الكبار يعملو منه ملازم الناس تبدأ تتدارسا المواضيع الناس بتفتحا هنا دي إن شاء الله، وربنا يوفقنا جميعا
