برهانيات كوم / الطريقة البرهانية
حكاية الفار في مركب عبد الغفار
كان ياما كان ياساده ياكرام ولايحلى الكلام إلابذكر النبي عليه الصلاة والسلام، أخنوخ خلف ولد وسماه متوشلخ وعلمه العلوم فكان موسوم ومتشلخ وكان في زمانه وقبله علما كتير أهل تقوى وبر زي ( ود و يغوث ويعوق وسواع ونسر) عبدوا الإله بدين آدم وشيث الحبر، ونور النبوة عارف طريقة في نسل الأصول ما يفر فضلت خلافة شيث في أخنوح ومتوشلخ وبعدهم راحت لامك وفيها النور متبرزخ،ويجي الليل بعد النهار وينام الخير والأخيار وبعد موتهم يظهر ظلام وشرار وتحكم ملة الأشرار ويطلع إبليس اللعين من غابة الأشجار في شكل ناسك ومتعبد والزهد واخده ستار يلاقي الناس حزانى على موت ود ويغوث من صحبة الأخيار يقول بأعلى صوته ياناس عندي لكم أخبار صورة حبيبكم ود منحوته بالأحجار تخلي صورته في بيتك وتشوفها ليل ونهار علشان تفضل قلوبنا بهم عايشه باستمرار، وفضل اللعين ينشر سمومه في السوق وللسمار وراجت تجارته ولجهنم بقى سمسار، وطبعا حب الرياسة في كل بيت وقبيله ودب النزاع بين كل عيله وعيله وكل بيت إختار صنم لواحد من الأخيار إن كان في القبيله دي سواع يبقى القبيله التانيه نسر لها إله مختار وماتوا الكبار وكبروا الصغار على ملة الفجار ونسيوا خالقهم الواحد القهار ولكن الليل مهما يطول لابد يطلع له نهار ولكن لحد مايطلع يطبل الطبال وزمر الزمار، والليل فيه من نام من التعب ناصب وفيه من قام بالشر واصب وأما الخير من نسل أخنوخ في بني راسب إتولد طفل لمهمته مناسب، نازل دموعه تجري بالمدرار وصت بكاه مالي كل الدار وواصل من جار لسابع جار أبوه لامك نظر له وقال ملأت الذنوب الأرض وجه أوانك ياعبد الغفار عليك المدار والحق منتظرك بالسر والإجهار، ويتولد الإيمان وينمحي عالم من الكفار ولكن خللي بالك الصبر تاخده شعار مشوارك طويل وطوله قرون معشار ماتعرف الراحه من كترة الأسفار تناجي ربك يجيبك بالسما مدرار.وعبد الغفار في طفولته منعزل دايما وفي خلوته بلوته تختال وتتزيا، ولعبته غريبه وعجيبه لاهي معروفه ولا للناس مألوفه، الأطفال يعملوا أصنام من طينه أو حتى من سكر وعجينه وهو يتخيل سفينه في أفكاره دفينه ويبنيها ويهدها في أحلامه ويقول لالالا مش متينه ومره يقول دي مركب من الخشب تتركب وفيها كلنا نركب ونروح المدينه... مدينه طيب يعني إيه مدينه ويعني إيه سفينه؟؟ويكبر عبد الغفار ويمشي بالمشوار يلاقي الناس بيسجدوا ويصلوا للأصنام صغار وكبار يقول كون واحد وخمسة أرباب عجب العجاب يامجري السحاب ومسبب الأسباب إفتح لي في حبك باب بلا ضلفه ولاحجاب يارب الأرباب ياغفار ياتواب.ويبكي علي حال الناس وينوح أيام وليالي وبسره مابيبوح ويسجد ويبكي ويناجي ياقدوس ياسبوح ياقدوس ياسبوح ياقدوس ياسبوح ياقدوس ياسبوح ياقدوس ياسبوح.لمامن كترة مناجاته ونواحه ناجاه ربه وقاله يانوح بالسر ماتبوح أنا خلقتك وأعطيتك نبوه ورسالة روح تمحي الضلال والكفر ونفحه للمنفوح، وتبقى مثال للورى في كل كتاب ممدوح، لا لغيري تسجد ولاتصلي والشمس تيجي تروح وتبلغ الخمسين من العمر تبدأ بالرسالة تبوح قدوس سبوح قدوس سبوح رب الملائكة والروح. لاحول ولاقوة إلابالله أنا الظاهر من كتر التفكير جنيت وأكتر مما استحق على ربي اتمنيت وبعدين مين نوح؟ أفكاري بتيجي وتروح قدوس سبوح رب الملائكة والروح، أنا أحسن على البيت أروح، يقوم يسمع المناجاه تاني ويسمع إللي سمعه أولاني آه ياني آه ياني، يانوح أنا ربك أناجيك ومن بين ضلوعك أناديك كده صلاتك وكده صيامك وذكرك يكون بالممزوج من إسمي وإسم حبيبي مدروج (أمُلّحلّمهُد) بتعلى بيه على الموج، وراحت ايام وجت أيام والذكر دايما على الدوام والبكا ما خلى عيونه تنام والدموع على الخدود تنهل ماتنهام ويا سلام سلم ياسلام، وعبادة الأصنام لكل الأنام خلت قلوبها حطام واتفرج ياسلام على لعبة الأبالسه اللئام وكان ياما كان.أساس الخلق آدم وأساس الأنبياء نوح وأساس بنى إسرائيل يعقوب وأساس الكتب القرآن وأساس القرآن الفاتحة وأساس الفاتحة بسم الله الرحمن الرحيم، وكان ياما كان يا سادة يا كرام ولا يحلى الكلام عن سيدنا نوح الهمام إلا بذكر النبى العربى عليه الصلاة والسلام، وقالوا إن العربى أول من نطق بيه نوح علمه له جبريل وهوعلمه لسام إبنه ومنه إندثر وانحسر لغاية سيدنا إسماعيل على لسانه ذاع وانتشر، المهم إن نوح عليه السلام شاف فى المنام إن قبره مع أحفاده هود وصالح وشعيب بين زمزم والركن والمقام بعد ألف من الأعوام، ومن نومه قام وحسب سنين عمره لقاها خمسين من الأعوام بعد عدد الشهور والأيام، وبدأت المناجاه من ربه يأمره يسير على دربه ويبدأ باللى من الناس يحبه يدعوه لصلاته ونسكه وقربه، وفكر نوح فى زوجته هيليسا وكلمها فى السر عملت لها هيصه، قالت له يا راجل جنيت ورجعت تكلم نفسك وتتخيل لك إله بيسمع حسك، وكمان عاوزنى أصدق، أكيد فيه شيطان مسّك، ورفعت صوتها ونادت أولادها، يا سام يا حام يا كنعان يا يافث، تعالوا شوفو أبوكم عمال يخرف ويقول كلامه السم، أنا رايحه أشوف عراف ولا راهب يمكن يكون عقله كمان ذاهب (يا ود يا خالق يا سواع يا واهب) وخرجت وهى ممحونة وبالأشرار مشحونة، وقاموا الأولاد على أبوهم إتلموا وبكلامه إستمعوا واهتموا، كبيرهم سام كان دايما يفكر فى علوم إدريس ونفسه ومناه يلاقى نسخه من الكراريس عشان يذاكر ويتفاكر ويحارب بيها إبليس، وقال يا أبى إيه الحاصل بينك وبين أمى وليه خرجت ولسه الصبح متغمى، قال له يا إبنى الكلام ليك وإخوانك، لو كان الكون الواحد يديره إلهيين كلام مين فيهم يصير وكلام مين يستنى، ولا فيهم واحد لموت التانى يتمنى، واحنا نكون ما بنهم نتهان ونتعنى، رد حام وقال وهى دى عيشه ليها معنى، لابد من إنه يكون إله واحد ما يتثنى، وكنعان فكر كتير ونظر، وقال بكلامك ده يابويا تكونحياتنا فى خطر، الناس بتعبد (يعوق) وتستنى منه المطر، وعباد نسرا بتموت حميرهم فى مسرا من البطر ده غير (ود وسواع) وكمان سمعت بإله سموه (صعصاع) ده أنا عقلى منى ضاع، العقل ما يقبل غير إله واحد خالق ورازق ولكل عبيده بيساعد، يابويا إحنا معاك وأمى مسيرها تفهم، فرد عليهم يافث يعنى عاوزين تقولوا أمى مابتفهم وحياتها عندى لأخللى عيشتكم غم، وبعدين أبوكم ده، طول عمره عوير مجنون عنده خمسين سنة ولسه طالع له سنون وكمان ياكل سمك بربون مع إن الإله (ود) قال ده من عبادى مايكون، يعنى مخالف للكلام المقدس عشان كده مفلس ما معاه ولاسحنون، وخرج يافث يفتش على أمه، ونادى نوح يابنى تعال معانا مسيرها تمشى ورانا، رد يافث وقال ماتقول يابنى أنا مش ابنك وبكره تشوف غبنك، بكى نوح وقال يارب زوجتى وولدى يسيبوا الدرب، سمع الندا يا نوح اصبر وصابر ده الطريق لسه طويل وياما تقابل أذى يهد الحيل، روح لجارك وأصحابك يمكن تلاقى دليل، ومرت سنين وسنين ومافى معاه غير ولاده التلاتة على المُره معاه عايشين، وهيليسا تدخل وتخرج مع يافث المسكين، يستغربوا لما يلاقوا الولاد مع أبوهم من الساجدين، وكل ما يخرج نوح لدعوة الناس لله يرجع ويديه فاضيين مش لاقى واحد يوحد ويكون مع التايبيين، وجاءت سنين عجاف لا قطر فيها ولا مطر، والناس كل يوم تنتظر وجف وجه الأرض لا عشب ولا فطر، والناس تسأل الرهبان يقولوا أصل يغوث زعلان لأن المؤمنين ماقدموا القربان، يقوم الناس على المعبد معاهم بقر مع خرفان واللى جايب كبش وساحب وراه جديان، حتى النسوان قلعوا الذهب خواتم مع حلقان وخلعوا خلاخلهم باعوا لهم كردان، أما السما لا مطره ولا مزنه ولا سحابه تشوفها العين متزنه، ورجعت هيليسا البيت مخلوعه، معيزها ماتت ونشفت الينبوعه، وقالت يا نوح لو ربك صحيح قادر خللى المطر ينزل وأنا للبيت ما أغادر وابنى يلازمك ويبقى معاك صابر، نظر لها نوح وقال روحى للكهان وقولى نوح بيقولقدامكم ثلاث أيام ينزل عليكم مطر يكفى ثلاث أعوام بشرط تستغفروا من عبادة الأصنام، خرجت هيليسا فى التو واللحظة وقابلت الكهان وقالت لهم على كلام نوح وشروطه ووافقوا إلا جماعة منهم حلفوا من الأصنام مايفوتوا، ولكن الباقين مااهتموا وعلى بيت نوح راحوا واتلموا وسلموا الأمر ليه وبسم الله سموا، وفى الميعاد نزلت المطره فى كل واد وعم الخير البلاد، وظهر العشب وكبروا الولاد، وفرح نوح بنصر ربه ليه وقال الحمد لله الناس جاها الفرج وارتاحت وكفرهم بالله كانت غمه وانزاحت، والحاجة راحت فاستراحت، فاسترحنا فاستريحوا وده كان أول مديحو، ولكن الكهان بتوع زمان اتلموا على بعضهم وقالوا ما ممكن نوح يغلبنا بربه لأن الوارد اللى كان جاى لنا بالطبع حايروح له، ونطلع من المولد بلا حمص والخير ينزل على نوح واحنا بنبصبص، إحنا نقول دعينا سواع وهو استجاب من دون الآلهه ونزل مطر للناس والفال الحسن فالها، وانتشر الخبر كما فى الهشيم الشرر وكلهم رجعوا لعبادة الصنم وبالله كفر، وما فضل مع نوح غير أولاده الثلاثة و من الجيران ثلاثة من الرجال معاهم بناتهم الثلاثة وراجل مسكين من غير زوجه ولا ولد، وليس من وجوه القوم فيهم رجل ينعد.. وكان ياما كانكان ياما كان وياما دار الزمان باللى جرى واللى كان، واحد فتح دكان يبيع فيه مستكه وحبهان وعلى وجهك يبان يانداغ اللبان، ودفاتر النسيان مليانه بالدخان، واحد جاى من باكستان والتانى ساكن خورفكان يتقابلوا فى الجرنان عشان الصلا على النبى العدنان، وعشان خاطره اتخلق المكان ويوم مولده استدار الزمان، واللى ما يحبه فى صوابعه يمصمص ويطلع من المولد بلا حمص، واللى يحبه شقاه يسعد والخير يجيله لا يحصى ولاينعد وزى مابيقولوا أما بعد...نرجع لعم عبد الغفار وحكاية الفار لوقتنا هذا مش باين له قرار، لا هو ساكن سطوح الدار ولا هو زاير من الزوار، ولسه ليله ما طلع له نهار، تسعومية من السنين عدوا وأتباع سيدنا على الصوابع ينعدوا، ورجعت الرؤيا لمولانا بصنع السفينة وشئ لله يا سيدة سكينة على نوائب الدهر كونى معينة، يا بارئ يا مخترع يا مالك الملك فهمنى كيف يصنع الفلك، جاله الوحى يزرع شجر فى حى الغجر، فروعه كالأمواج يسمى بشجر الساج، وبعد أربعين سنة يكون استوى وما انحنى، يقطع الخشب ويجففه وفى الماء يعطنه وفى الشمس ينشفه، ويبنى منه بيت زى الديك ثمانين فى خمسين وللسما ثلاثين والذراع مزازيك، قال للملك فهمنى ربنا يخليك، فكانت المناجاه رحم الله والديك، اجعل البيت أزور يعنى على ثلاث صور راس الديك الناقر وجوف الصيد الطاير وديل السمك الباحر، وتكون ثلاث طبقات مداخلها من الجنبات ألواحها عاليات ودسرها تحتيات، وأطول شجرة عندك اعملها صارى مدملك يكون من الدور التحتانى ماسك وفى الفوقانى أعلى من راسك وتحفر عليه اسمى ممزوج باسم حبيبى ووسمى وتقول يا أصحاب القلوب والهدى (املحلمهد) وتقطع شجرة بالعرض مش بالطول وتتركها يحول عليها الحول، ويكونوا أربع قطع فى شكل عيون ودواير وتكتب رميز سخرنوز يوحانز عبد الناصر، وحال الحول وزاد الطول وسقف الفلك خلاص ما يطول، وفى الصحرا كان الفلك والخلق يستعجبوا من نبى بقى نجار ويتعجبوا، يا نوح مالك إيه اللى جرالك تركت النبوءة والناس كلها موبوءةونوح يناجى يا نور النور امتى يكون الدور يجى الجواب لو فار التنور تكون مسرور ويكون الحج المبرور والذنب المغفور، نادى أتباعك وسيب اللى باعك ولملم متاعك، يناجى نوح يارب وباقى الخلايق يكون الجواب ذكر وأنثى وصنف منهم ما تنسى، أولهم الأوزة وآخرهم الحمار الله! أمال فين الفار يا عبد الغفار أوعى تنسى تدهن الفلك بالقار، وإلا تغرق ما يبان لك قرار، يا ستار يا ستار، وبدأت الأزواج على الفلك تجرى ودخلت فى أمان والكل بعد ذلك غرقى! ومعاهم هيليسا ويافث ولكن ابن عباس قال كنعان هو اللى غرق مع أمه زمان، المهم المطره نزلت من السما والأرض انفتحت مندمه، وربنا رفع البيت اللى حجه آدم وشيث وجبريل خبا الحجر الأسعد فى جبل أبى قبيس، والموج علا وزاد وغطى كل البلاد وعلى كل جبل وملا كل واد، يا كنعان يا ابنى أمك غرقت تعالى ماتسبنى، قاله أنا طالع جبل يعصمنى، يا ابنى شايف أم الطفل هناك فى أعلى جبل والميه غطتها لرقبتها ورفعت الطفل بإيدها وكبدتها لكن الموج أخدها وفلذتها، وقبل ما يكمل الكلام كان الموج خطف كنعان وفلان وعلان وترتان، نرجع مع القول لمن صلى على الرسول اسمه على الصارى أبو البتول مع الاسم الله وعليه القبول، والعيون الأربعة قاعدة ومتربعة تحمى السفينة من كل زوبعة، أبوبكر عمر عثمان على بالسريانى مدرقعة، ووصلت السفينة مكان الحرم وطافت شهور ستة يا محترم، وفى اتجاه روسيا وعلى الجودى تستجم، لكن الناس قالوا فى الكوفة وناس قالوا فى البصرة وناس قالوا فى تركيا لكن اسمع كلامى أنا أحسن لك وماتهتم! وبمرور الأيام كترت الزبالة والركام وظهرت ريحة تجلب الزكام ونوح قال يارب إيه العمل قاله المولى يا نوح روح للفيل وشد ديله ومن زوجته اعمل مثيله، راح نوح لديل الفيل وشده نزل خنزير إيش كبره وإيش قده وكذلك الأنثى جابت عديله جريت على المحروس تبوسه من خده، نزلوا على الزباله والوساخه هات يا أكل عشان كده يمكن حرام علينا لحمهم فىالموضوع والشكل، وانزاحت الريحة والعباد من الزبالة أصبحت مستريحة، ولكن عمنا عبد الغفار صار مستعجب! سبحان القادر مخلوق جديد فى المركب وجاى من الديل مصنوع ومتركب! يعنى أنا لوشديت ديل المخلوق الجديد يجينا منه وليد يمكن! ما تيجى نجرب، بلاش ياعم ماحدش عارف يمكن الدنيا تتكركب وتتشقلب، واحنا فيها حاجة ما كله بالأقدار مكتوب ومترتب، شد ديل الخنزيرين مع بعض لاحسن يكون فيه مخلوق يعض وقرقض، وبالفعل شد الديلين وبعدها كان ويله ويلين، جاك الفار يا عبد الغفار يقرض حبال الدار ويحفر فى كل جدار ودانه كبار زى جده الفيل الجبار وخرطومه بقى شويه صغار، والحوسه بقت مجان وكان ياماكان.كان يا ما كان يا سادة يا كرام ولا يحلى الكلام إلا بذكر النبى عليه الصلاة والسلام، وحلاوة زمان يا ملبن، وكلام حلو ومعقول وبالحليب متعجن، والناس عليه تغنى وتدندن، وأقول موال ينزه صاحبه يطلعه من هموا وقرايبوا حواليه يتلموا، ويا بخت من كان النقيب خالو والبقال يكون عمو، وأهى دنيا ماشيه لا بتخلى الراكب راكب ولا الماشى ماشى، حتى لو انت مستريح فى عيشتك تنكش لك فى حاجة تنكد بيها على نفسك، وعيسى نبى وموسى نبى وكل من له نبى يصلى عليه، ويرجع مرجوعنا لعمى عبد الغفار اللى صار محتار من المخلوق الجديد اللى ما له قرار، دايما بيجرى ومعاه رفيقته ويحفر فى الجدار وكل مايجى يمسكه يبلغ فرار ودايما منه يفر، عشان كده سماه فار، وبعدين أعمل إيه معاك يا فار، يارب يا ستار يسر لنا الأقدار وشوف لى حل مع القرقاض الدوار، سمع الندا من الحليم الستار وقاله الإذن بالخلق كان من الفيل ليه انت بدون إذن تشد تانى الديل، قال يارب غلطان ومالى دليل ولكن الفار تعبنى ومافى حيل، كمان شوف لنا صرفه فى الأكل والشرب، زادنا خلص وزودنا رماه السرب، والفار عامل عمايله ما بيسكت ولا بالضرب، سبحانك يارب يا مفرج كل كرب، قال له روح على الأسدين وشد منهم الديلين ينزل مخلوق عجب يعلم الفار الأدب، وكل شئ وله سبب، فرح عمنا نوح وجاله السرور بعد النوح وراح للأسد واستسمحه يشد الديل ويروح، نزل السنور والسنوره أو زى مابيقولوا المصريين القط والقطه وأهل العراق يقول البزون والبزونه، أما الشوام يقولوا البس والبسه، والمغاربه يقولوا الهر والهره، وأهل السودان بيقولوا من زمان الكديس والكديسه، وهردبيسا يا أم عيسى، طيب يارب الأكل والشرب، يا نوح مالها مية الطوفان اروى بها العطشان، والسمك طعام عاوز إيه كمان، قال رضا الرحمن، وبعد أربعين ليله ويوم وقف المطر وجفت من الأراضى عيون، وبدت السفينة تدور على مرسى وكل داير لازم يجيله يوم يرسى، سيدنا نوح نادى الغرابوقال له طير شوف لنا أرض ظهرت قبل ما اليوم يتمسى، طار الغراب يحوم وينعق قام لقى له جيفه قعد ينتش ويلعق، ولا جاب خبر للسفينة ولا ناسها، والأرض صارت جيف ساسها وحراسها، لما فقد نوح الأمل قال للحمامة روحى شوفى أبو زمل، طارت الحمامة وقعدت تحوم، وعاوزه ترجع قبل ما يخلص اليوم، ولكن الرحلة استمرت وعلى جبل الجودى استقرت، ويا جبل الجودى انت فين قالوا فى العراق بالكوفة وقالوا بتركيا والسما مكشوفة، وقالوا فى الحجاز والشمس مكسوفه! قلت يا مولانا الجودى فين اللى عليه السفينة راسيه، قال لى يا ولدى الجودى ده فى روسيا، وجات الحمامة بالخبر، غصن الزيتون شايلاه بمنقارها، وقالت يا سيدى الأرض بان قرارها، وكان أول مولود فى السفينة جاى من بيضة الصقر حن لوليفته وجابوا فرخ من بيضة، ولسوء الحظ خالف الأمر طلع عيونه كلها بيضا، اتوسل الصقر لوليده عشان ينظر، مسح بمنقاره على الصارى ما ينضر، وبسر اسم الحبيب مسح عيون الوليد صار حاد النظر، ولغاية اليوم والليلة الصقر هو الوحيد اللى يعرف فين السفينة، ومع كل مولد يسافر لها ويرجع، يمسح من الصارى بالعيون تنصح، ومين غير الحبيب بالخير دوام ينضح، وعجبى على طير يفهم خير من ولاد آدم والخير حواليهم يقدم ويتقادم، ويقولوا التوسل حرام حتى بالبنى آدم، ورسيت سفينة نوح على الجودى، وأنا قاعد أشوف الخلق واغنى على عودى، ويا ليالى الهنا دومى لنا وعودى، ونزل سيدنا نوح وأولاده الثلاثه وكل ولد منهم تزوج من بنات المؤمنين الثلاثه، واتفرق الناس، وصاروا شعوب وقبايل، اللى منهم عدل وغيره بقى مايل، وكمان الحيوان نزل واتفرق لكن الخنزير مازال للزبالة يحن ويرق، عشان كده أكله للعقول يغلق ويخللى تفكيره فى خمرة ورق، والقط ما نسى أبدا عداوة الفار، يدور عليه يرعبه حتى فى سقف الدار، بنظرة منه الفار يتململ ويقع فريسة ولو وزنه بقى قنطار، وإن غاب القط إلعب يا فار أو إن غاب أب شنب لعب أب ضنب، وبعدالطوفان سيدنا نوح عاش خمسين تكون حياته بالكمال ألف وكمان خمسين، وده بالحساب مش تقول تخمين، أو تقول ده عقلى تخين، هو لبث فى قومه ألف إلا خمسين، ودى مدة الدعوة فى قومه يا عم أمين، وهو كان نبى يوم ولادته لابد وهو فى الخمسين، وبعد الطوفان عاش كمان خمسين، تبقى الحكاية كملت ودار الزمان وكل شئ انكشف وبان، وكان يا ما كان.
